THAANGNUAI TONGLEL NETWORK

ZUANGZAANG=KHAUKUUL=THAANGNUAI

Thaangnuai Khua sung leh Gamsung Thu

 Thaangnua Khua Hausa Sem Ngeiteng

 Thaangnuai Khua leh Tui aa dingin ahun, neihsa, anuntakna uh pia in itna tak, deihsakna tak tawh hong semkhia Zahtak Hausa te,

     Amin                           Asep Kum

Pu Do Tawng                   1800 .

Pu Phut Son                    1880 - 1890

Pu On Suak (Ukpi Zaa)  1890 - 1942

Pu Thang Ngin                1945 - 1955

Pu Ngul Cin Thawng       1956 - 1960

Pu Suan Ngo                    1960 - 1964

Pu Lian Za Pum               1964 - 1974

Pu Hang Khaw Kam        1974 - 1978

Pu Suak Khua Cin           1978 - 1982

Pu Mang Khua Thang     1982 - 1986

Pu Hau Lian                     1986 - 1989

Pu Kam Za Khai              1989 - 1996

Pu Zen Za Cin                  1997 - 2003

Pa Kam Ngin                    2003 - 2006

Pu Kam Cin Khai             2006 - 2007

Pa Zam Do Pau                2007 - 2013

                             

Thaangnuai Inn Pha Zah

                       Thaangnuai khua pen Taang khua khat hi-in Pasian thupha hong pia aa tulai takin Inn 100 val  ki om in mi 800 val aki tenna khua nuam mahmah khat a hihi.  Khua sung zong aveng aveng in ki khen lai aa, Bualpi, khualai, Ngalu, Samual, Khuatung ci-in veng (5) in ki khen  hi. Khua sung zong anop mahmah bangin Mite zong kithu nuam thei mahmah hi. 

Beh leh Phung omte 

                        Khua khat ii hih ciangin Beh leh Phung  U leh Nau cih bangin ki om hamtang  aa, tua mah bangin Thaangnuai khua ah zong Beh leh Phung U leh Nau kithupi sak mahmah aa Thaangnuai Khua zang in Beh khat, phung khat, u leh nau khat bang in  aki-it, aki huai mahmah  khua khat ahihi.  Thaangnuai Khua sungah Beh nam tuamtuam om aa Beh min te in,

   Namzo

  Songphut

    Tomu

   Suantak

     Zilom

             Cih bang in kiom a khua zaangin Pi leh Pu, Nu leh Pa ,U leh Nau , Sungta Putu vive ahihi. Beh khat Phung  khat bangin akihuai mahmah Khua khat ahi hi.

 Ngam Leh Khuahun

       Thaangnuai gamsung ah singkung tuamtuam om aa, Taakkung, Hiangkung ,Phuitong,Ngeisok leh adang sing kung a tuam tuam te po aa, Sakhi leh Sa dang tuamtuam te nuam tak in om uh hi. Nov pan Feb dong a vot pen hun hi a, March pan Jun tha dong a lum pan hun hi. July pan Oct kha dong pan nguah zu in mei kai dimdiam uhhi.

 

      

 Pil na lam Sang
                     Thaangnuai khua mite khantoh na pilna tampi hong ngahsak Sangpi hi aa tulai takin   Muluan sang (Basic  7 Standant Education School)  om aa,  Tan 7 ciang lai ki sin thei hi. UNDP te piak ( 80'x24') (Taih) sang inn khat leh,kumpi piak (120'x24' ) sang inn khat hi-in  sang Inn nih ki nei hi. Tu lai tak sang naupangte Leitung pil na  hong sin sak ziahziah hi. Hongpia khia Kumpi te leh UNDP te tungah Thupha hongpiak sak tahen. Amen.

 

 Ciin na leh khawi na

             Thaangnuai gamsung ah aki ciing, apiang te ,

Lo acres 1,000 bang pha in Thawhbat kung inn kim in nei hi.  Apple acres 200 val, Lingmaw  acres 5, Tampaza acres 7, Seek acres 5, bang om aa, a dang teng ah Vaimim, Zotaang, Aalu, Be tuam tuam leh mehteh mehngah te ki ciing hi.   Sial(60 val), Vok(80 val), Keel(700 val), Ak(300 val) leh Zawhngeu, Bilpi, Ui ... cih te ki khawi uh hi.

Thaangnuai Gamsung aa kikhawi Sialte

 

 Vai pai na leh kizop na

            Kawlpi-Tedim lampi pan, Sozang-Dim Zang-Thaangnuai motor lampi(tai 6 val) kizop na om hi.

              Thaangnuai-Thuaklai, Thaangnuai-Akluai, Thaangnuai-Sozang, Thaangnuai-Phumnom cih bang in kizop na (khe tawh bek pai thei) lampite zong om hi. Khua ah  motor cycle nei tam mahmah ta aa, khuasung ah hawl za za ta hi.

Khua pen sozang tawh kizom in kihopih thei hi. Sozang pan in mun tuam tuam te zong ki ho pih thei hi. Sozang ph no. pen-

Pa Cin Khan Khual 070-50100

Pa Kam Sian Khai   070-50197

  TV leh Satellite te tawh leitung thu piang te ahun lap in mu thei ,ki za thei ta hi

                                  

Thaangnuai Motor Lampi

 

 

Dam tui leh Khuaphelep
 

                 Thaangnuai Khua mite hoih deuh uhteh hongki ci-in na tui nek uh hi, ci tanghtangh uh hi. Tu laitak tui lakna te sak lam pan(1") tui zawl khat  leh ni suak na lam pan (2") tui zawl te tawh dawn ding tui siangtho leh zat ding tui siang tho te ki ngah ziah ziah hi. ki zang zolo liang ahih man in, meh teh meh ngah ciin na in ki zang ziah ziah aa, khua hun leh Tuite paninTopa thupha ki ngah  hi.

Hi bek hilo in Ngualo lui pan in tui tha tawh Kilowatt 5 khua phelep mei in khua sung pen sun ni bang in hong tang sak tawn tung hi. An huan na leh mei awi na ding pen sing mah zang lai hi.


 

 Biakna leh Pawlpi

                    Thaangnuai Khua ah Christian  hong tun 1906 kum hi-in khua zaang phialin Tapidaw nasuak uh hi. Kha lam ah Kumza cin na ( Centennary) 2006 kum in nasia takin kibawl aa, Tapidaw om masak na, khua khat in mikim in hong ciamteh hi.Pawlpi omte in Baptish Church, Assemblies Of God Church, Evangelical Baptist Church cih bangin kiom hi.Khuasung  anop mahmah bangin Biakna Pawlpi zong nuam mahmah hi.